Félagið

Aðalfundur Knattspyrnufélagsins Reynis

í Reynisheimilinu, fimmtudaginn 13. febrúar 2025 kl. 18:00

Boðað er til aðalfundar Knattspyrnufélagsins Reynis 2025. Fundurinn fer fram fimmtudaginn 13. febrúar 2025 í Reynisheimilinu við Stafnesveg í Sandgerði og hefst kl. 18:00.

Á dagskrá eru hefðbundin aðalfundarstörf  í samræmi við 7. gr. laga félagsins.

Á fundinum verða bornar upp tillögur að breytingum á lögum félagsins sem eru aðgengilegar til skoðunar á heimasíðu félagsins www.reynir.is

Fundurinn er öllum opin, en samkvæmt 9. gr. laga félagsins eru það allir skuldlausir félagsmenn 16 ára og eldri sem hafa kjörgengi til stjórnastarfa, tillögurétt og málfrelsi á aðalfundi félagsins. Atkvæðisrétt hafa hins vegar einungis fulltrúar íþróttadeilda félagsins í samræmi við ákvæði sömu lagagreinar.

Fyrir hönd aðalstjórnar Knattspyrnufélagsins Reynis,

Ólafur Þór Ólafsson
formaður

Þriðjudaginn 29. október 2024 var undirrituð viljayfirlýsing á milli Knattspyrnufélagsins Reynis, Knattspyrnufélagsins Víðis og Suðurnesjabæjar um undirbúning á stofnun nýs íþróttafélags í Suðurnesjabæ. Stofnaður verður stýrihópur skipaður fulltrúum frá þessum þremur aðilum til að halda utan um verkefnið með það að markmiði að nýtt félag verði formlega stofnað í október eða nóvember 2025.

Stýrihópurinn mun skila áfangaskýrslu í febrúar 2025 sem verður lögð fyrir aðalfundi félaganna Reynis og Víðis. Í þeirri skýrslu komi fram tillögur að skipulagi á nýju félagi ásamt drögum að samningi milli Suðurnesjabæjar og hins nýja félags. Jafnframt á þar að liggja fyrir áframhaldandi tímalína vegna verkefnisins að stofnfundi félagsins. Hvort félag mun taka sína endanlegu ákvörðun gagnvart verkefninu á aðalfundunum sem fara fram í febrúar eða mars á næsta ári.

Í viljayfirlýsingunni kemur fram að markmiðin með því að vinna að stofnun nýs íþróttafélags séu eftirfarandi:

• Auka fagmennsku og gæði í íþróttastarfinu.
• Stuðla að fjölbreytni íþróttagreina.
• Til verði eitt íþróttafélag sem samfélagið í Suðurnesjabæ sameinast um.
• Stuðla að aukinni íþróttaiðkun hjá fólki á öllum aldri og af öllum kynjum.
• Unnið verður markvisst að uppbyggingu á aðstöðu til íþróttaiðkunar í Suðurnesjabæ og bættri nýtingu núverandi mannvirkja.
• Aukinn og markvissari stuðningur frá Suðurnesjabæ við hið nýja íþróttafélag.

Mynd: VF/Hilmar Bragi

FRAMTÍÐ ÍÞRÓTTASTARFS Í SUÐURNESJABÆ

Félagsfundur hjá Ksf. Reyni í Reynisheimilinu mánudaginn 28. október 2024 kl. 20:00

Á fundinum mun aðalstjórn Ksf. Reynis gera félögum grein fyrir því samtali sem hefur verið í gangi við Ksf. Víði og Suðurnesjabæ um framtíð íþróttastarfs í Suðurnesjabæ.

Fyrir hönd aðalstjórnar Knattspyrnufélagsins Reynis,

Ólafur Þór Ólafsson
formaður

Knattspyrnfufélagið Reynir sendir afmæliskveðjur til Knattspyrnufélags Reykjavíkur sem í dag, 16. febrúar 2024, fagnað því að liðin eru 125 ár frá stofunun félagsins.

KR og Reynir er félög sem hafa í gegnum tíðina tengst sterkum böndum og hafa KR-ingar oft verið gestir okkar í Sandgerði á hátíðlegum stundum, svo sem á stórafmælum og í minningarleikjum um Magnús Þórðarson.

Megi samband þessara félaga halda áfram að blómstra í ókominni framtíð.

Þann 23. október 1932 var Ungmennafélagið Þróttur stofnað í Vogum. Þróttarar fagna því 90 ára afmæli félagsins síns um þessar mundir.

Reynisfólk hugsar með hlýhug til þessara appelsínugulu nágranna sinna og sendir þeim kærar afmæliskveðjur á þessum tímamótum.

Megi Þróttur halda áfram að vera kraftmikið og líflegt félag sem ekki aðeins bætir samfélagið sitt í Vogum heldur sendir gleðistrauma til íþróttaáhugafólks um allt land.

Í dag, 11. maí, eru liðin 86 ár frá því að Knattspyrnufélagið Víðir í Garði var stofnað. Við hjá Knattspyrnufélaginu Reyni sendum kærar kveðjur og hamingjuóskir til Víðisfólks nær og fjær á afmælisdeginum. Saga þessara tveggja félaga er samofin bæði innan vallar og utan enda Víðisfélagið stofnað aðeins ári á eftir að Reynir varð til. Það er líka fátt skemmtilegra í íþróttum en góður nágrannarígur.

Í dag eiga félögin það sameiginlega hagsmunamál að aðstaða til íþrótta í Suðurnesjabæ verði bætt og íþróttastarf í bænum eflt og þurfa að snúa bökum saman í því verkefni. Það breytir þó ekki þeirri staðreynd að Reynisfólk hlakkar alltaf til næsta sigurs á Víði og við treystum að Víðisfólk hugsi eins til Reynis.

Vaskur hópur úr sumarvinnu Suðurnesjabæjar hefur verið að störfum á knattspyrnusvæði Reynis síðustu vikuna. Þau hafa unnið frábært verk eins og má greinilega sjá á myndum hér að neðan og kunnum við þeim bestu þakkir fyrir.

Þess má geta að á áætlun þetta sumarið er að laga þakkant á Reynisheimilnu og nú í vor var skipt um lofttúður úr klefum. Það voru Kiddi Halldórs og félagar í Blikksmiðju Suðurnesja sem sáu um verkið og er ásýnd hússins allt önnur eftir endurbæturnar.